തെയ്യാട്ടം

Posted by Fr Nelson MCBS on June 12, 2016

Kerala-Theyyam

വാദ്യമേളങ്ങളുടെ ശബ്ദം ഉച്ചസ്ഥായിയിലെത്തിയിരിക്കുന്നു.  തളയിട്ട കാലുകള്‍ മുറുക്കിച്ചവിട്ടി, മാറിടം കുലുക്കി ,പള്ളിവാള്‍ ചുഴറ്റി ,കണ്ണുകള്‍ ചുവപ്പിച്ചു , എട്ടു ദിക്കും വിറയ്ക്കുമാറ് അലറിവിളിച്ചുകൊണ്ട് കണ്ടേങ്കാളി പരിസരം മറന്നു ഉറഞ്ഞു തുള്ളുകയാണ്. കുരുത്തോലപ്പാവാടയിലും പുറത്തട്ടുമുടിയിലും ഉറപ്പിച്ചിരിക്കുന്ന ചെറുതും വലുതുമായ തീപ്പന്തങ്ങള്‍ അസാമാന്യവേഗത്തില്‍ കറങ്ങുന്ന ഭഗവതിക്ക് ചുറ്റും തീ വളയങ്ങളായി കാണപ്പെട്ടു. കൂലംകുത്തിയോഴുകുന്ന കാട്ടാറിന്‍റെ ഹുങ്കാരം ദേവിയുടെ ചിലമ്പോലിയില്‍ ലയിച്ചില്ലാതെയായി. കാവിലെ വിളക്കുകളിലെ തിരിനാളങ്ങള്‍ കാവിലമ്മയുടെ നൃത്തം കണ്ടു ഭയന്ന് നിശ്ചലമായി നിന്നു. മുതുവന്‍ മലയിലെ നിബിഡവനത്തിലെ ക്രൂരമൃഗങ്ങള്‍ ആ രാത്രി പുറത്തിറങ്ങാന്‍ ഭയന്നു. 

വീക്കുചെണ്ട കൊട്ടിക്കൊണ്ടിരുന്ന മലയര്‍ക്ക് ആവേശം മൂത്തു. കാവിനെ ചുറ്റി, കോട്ട പോലെ തലയുയര്‍ത്തി നില്‍ക്കുന്ന മലകളില്‍ തട്ടി അത് പ്രതിധ്വനിച്ചു.  ഉറഞ്ഞാടുന്ന കാളിക്ക് മുന്നിലെ തീക്കുണ്ഡത്തില്‍ തീ ആളിക്കത്തിയപ്പോള്‍, ചുടലഭദ്രകാളിയെ തന്നിലെക്കാവാഹിച്ചാടിയിരുന്ന കോലക്കാരന്‍ കേളുപ്പെരുവണ്ണാനില്‍ നിന്നും ദൈവിക പരിവേഷം കുറച്ചുനേരത്തേക്ക് ഒഴിഞ്ഞുനിന്നു.  അയാളുടെ ആട്ടം യാന്ത്രികമായി.  ആളിക്കൊണ്ടിരുന്ന തീക്കുണ്ഡത്തില്‍ കേളുപ്പെരുവണ്ണാന്‍ അവ്യക്തമായ ഒരു രൂപം കണ്ടു.  അത് ക്രമേണ വ്യക്തമായിത്തുടങ്ങി.  ചുവന്ന പട്ടുചേല ചുറ്റി, ജടകെട്ടിയ മുടിയഴിച്ചിട്ട്, കലങ്ങിയ കണ്ണുകളുമായി ഒരുകൌമാരക്കാരി.

                അത്……അത്….അതവളല്ലേ….?’

 ചീഞ്ഞഴിഞ്ഞ അവളുടെ ജഡം പെരുവണ്ണാന്‍റെ കണ്ണുകളിലൂടെ മിന്നിമറഞ്ഞു.  ഉറക്കെ ശബ്ദിച്ചുകൊണ്ട് പെരുവണ്ണാന്‍ ആകെയൊന്നു കുലുങ്ങിവിറച്ചു.  അയാള്‍ക്കൊപ്പം ഉടുത്തുകെട്ടിലുറപ്പിച്ചിരിക്കുന്ന തീപ്പന്തങ്ങളും ഇളകിയാടി.

                      തനിക്കു സ്വന്തമെന്നു പറയാന്‍ അവള്‍ മാത്രമേ ഉണ്ടായിരുന്നുള്ളൂ.  മഴക്കാറിനെ പശ്ചാത്തലമാക്കി മുതുവന്‍ മലയുടെ നിറുകയില്‍ സ്വര്‍ണ്ണനിറത്തില്‍ കാണുന്നതേക്കിന്‍പൂക്കളുടെ അഴകായിരുന്നു അവള്‍ക്ക്. അവള്‍ കൊഞ്ചിക്കൊഞ്ചി സംസാരിക്കുമ്പോള്‍, പൊട്ടിയ മുളങ്കാടിനെ തഴുകി മുതുവന്‍ മലയിറങ്ങി വരുന്ന ഇമ്പമുള്ള കാറ്റ് ലജ്ജിച്ചു വഴിമാറിപ്പോകുമായിരുന്നു.

                                             ഓണക്കാലത്ത് അവള്‍ കുട്ടിത്തെയ്യമായിരുന്നു .  മുഖത്തെഴുത്തിനുള്ള അരിച്ചാന്തും, കരിയും മഞ്ഞളും അവള്‍ ഒരുക്കിത്തരുമായിരുന്നു .കാവില്‍ ആട്ടം കാണാന്‍ അവളും വരുമായിരുന്നു.  കാവിലമ്മയോടു ആവലാതികള്‍ പറയുമായിരുന്നു.  അരുളപ്പാടുകള്‍ക്കായി കാതുകൂര്‍പ്പിക്കുമായിരുന്നു .

                 ഒരു ദിവസം കാലത്ത് പള്ളിക്കൂടത്തില്‍ പോയ അവള്‍ മടങ്ങി വന്നില്ല.  താന്‍ അവളെത്തേടി ജലപാനമില്ലാതെ അലഞ്ഞു നടന്നു.  അവള്‍ക്കു ഒരാപത്തും വരുത്തല്ലേയെന്നു കാവിലമ്മയോടു മനമുരുകി പ്രാര്‍ഥിച്ചു.  പക്ഷെ…ആ പ്രാര്‍ത്ഥന വെറും പാഴായിരുന്നു.  രണ്ടു ദിവസങ്ങള്‍ക്കു ശേഷം അവളുടെ അഴുകിത്തുടങ്ങിയ നഗ്നശരീരം മുതുവന്‍ മലയിലെ കാട്ടില്‍ നിന്നും ചാക്കില്‍ കെട്ടിയ നിലയില്‍ ആരോ കണ്ടെത്തി.  ഒന്നേ നോക്കിയുള്ളൂ.  തല പിന്നോട്ടെറിഞ്ഞു നനവുള്ള പച്ചമണ്ണില്‍ കമഴ്ന്നുവീണു.

                      ‘ കാരണം………….’

‘ഏതോരച്ചനും താങ്ങാന്‍ കഴിയുന്നതിലും അപ്പുറമായിരുന്നു ആ കാഴ്ച.’

  പച്ച നോട്ടിന്‍റെ നറുമണമടിച്ചപ്പോള്‍ അവളുടെ അഴുകി ദുര്‍ഗന്ധം വമിച്ച ശരീരം കീറിമുറിച്ചു പഠിച്ചു കഥയെഴുതിയ ആശുപത്രിക്കാര്‍ അത് വെറും കെട്ടുകഥയാക്കി. പണവും സ്വാധീനവും കൈ കോര്‍ത്തപ്പോള്‍ കോടതിമുറിയില്‍ കള്ളസാക്ഷികള്‍ നിരന്നു.  നീതിയുടെ തുലാസില്‍ എല്ലാവര്‍ക്കും ഒരുപോലെ അളന്നു കൊടുക്കുന്ന നീതിദേവത കണ്ണുംമൂടിക്കെട്ടി അവള്‍ക്കെതിരെ മുഖം തിരിച്ചുനിന്നു.  അവളെ പീഡിപ്പിച്ചു കൊന്നവനെ കോടതി വെറുതെ വിട്ടു.

     പക്ഷെ കേളുപ്പെരുവണ്ണാന്‍റെ നീതി മറ്റൊന്ന്. അലഞ്ഞു നടന്നു അവനെതേടി.

               നിമിഷ നേരത്തേക്ക് ഒഴിഞ്ഞു നിന്ന ദൈവികശക്തി ഉള്ളംകാലിലൂടെ മേല്‍പ്പോട്ടു കയറി.  വൈദ്യുതാഘാതം ഏറ്റെന്നവണ്ണം പെരുവണ്ണാന്‍ അടിമുടി വിറച്ചു.  ഇതു കണ്ടു ഭയന്ന് മുതിര്‍ന്നവരുടെ പിന്നിലൊളിച്ച കുഞ്ഞുങ്ങളുടെ നിലവിളി ചാമുണ്ഡി കേട്ടില്ല .  ഭയന്ന് പാതാളത്തിലോളിച്ച അധര്‍മ്മിയായ ദാരികനെ തേടി വാളും പരിചയും കറക്കിവീശിക്കൊണ്ട് കലിതുള്ളി നടന്നു കാളി.  ധര്‍മ്മത്തെ പീഡിപ്പിച്ച ദാരികാസുരന്‍റെ ചുടുചോര കുടിക്കാന്‍ വെമ്പല്‍കൊണ്ട് ഭഗവതി അലറിവിളിച്ചു.  ആ ശബ്ദത്തില്‍ മുതുവന്‍ മല പ്രകമ്പനം കൊണ്ടു.  വിറയ്ക്കുന്ന കയ്യില്‍ പിടിച്ചിരിക്കുന്ന പള്ളിവാളിലേക്ക് ഒരു നിമിഷം കരിങ്കാളിയുടെ നോട്ടം പതിഞ്ഞു.   കേളുപ്പെരുവണ്ണാന്‍ ഉണര്‍ന്നു.

       ‘അതിലെ രക്തക്കറ……..’

         തെയ്യം കെട്ടാന്‍ ഇരുപത്തിയൊന്നു ദിവസത്തെ കഠിനവ്രതം, സാത്വികാഹാരക്രമത്തില്‍, സുഖഭോഗങ്ങള്‍ വെടിഞ്ഞ്‌ ഇരുപത്തിയൊന്നു ദിവസങ്ങള്‍. തെയ്യം കെട്ടാന്‍ പോകുന്ന മൂര്‍ത്തിയെ തന്നിലേക്കാവാഹിക്കാനുള്ള കഠിനവ്രതം. പുലര്‍ച്ചെ ഒരുമണി നേരത്ത് സംഹാരമൂര്‍ത്തിയായ ചുടലഭദ്രകാളിയെ തന്നിലേക്കാവാഹിക്കാന്‍ ധ്യാനനിരതനായിരിക്കുമ്പോള്‍ അവളുടെ മുഖം മനസ്സില്‍ തെളിഞ്ഞു വന്നിരുന്നു.  തീക്കുണ്ഡത്തിനു നടുവില്‍, മുഖത്തു നാഗം താഴ്ത്തി എഴുത്തിട്ട്‌, പുറത്തട്ട് മുടിവച്ചു, പള്ളിവാളും പരിചയുമേന്തി ഉറഞ്ഞു തുള്ളുകയായിരുന്നു അവള്‍.  രക്തം പുരണ്ട വാള്‍ തനിക്കവള്‍ എറിഞ്ഞു തന്നു.  കണ്ണ് തുറന്നു.  ഒരു നിമിഷം ചിന്തയിലാണ്ടു.  പിന്നെ കാവിലെ പതിയില്‍ നിന്നും വെള്ളമുണ്ട് പുതച്ചു പുറത്തിറങ്ങി.  ഭഗവതിയുടെ പള്ളിവാള്‍ കയ്യിലെടുത്തു.  അത് കയ്യിലെടുക്കുമ്പോള്‍ തെല്ലും ഭയം തോന്നിയിരുന്നില്ല.  കയ്യില്‍ പള്ളിവാളും കണ്ണില്‍ കത്തുന്ന പകയുടെ കനലും പേറി കനത്ത ഇരുട്ടിലൂടെ തെല്ലും ഭയമില്ലാതെ നടന്നു.  മുന്നില്‍ കുത്തുവിളക്കുമേന്തി ആരോ തന്നെ ആനയിക്കുന്നുണ്ടായിരുന്നു.  പുറപ്പാടിനകമ്പടിയെന്നോണം ചീവീടുകളുടെ കാതടപ്പിക്കുന്ന ശബ്ദവും, മുതുവന്‍ മലയിലെ കാട്ടാനകളുടെ മഞ്ഞില്‍ കുതിര്‍ന്ന ചിന്നം വിളികളും ഉണ്ടായിരുന്നു.

               നടന്നു നടന്നു ആ വലിയ മാളികവീടിനു മുന്നിലെത്തി.  ആരും കാണാതെ ആ വീടിനുള്ളില്‍ കയറി.  തികച്ചും യാന്ത്രികമായി.

          അവിടെ കണ്ടു ഞാനവനെ.  ശാന്തമായി കിടന്നുറങ്ങുന്നു.  ഒന്നുമറിയാത്ത ഒരു കൊച്ചു കുഞ്ഞിനെപ്പോലെ.  അവന്‍റെ മുഖത്തേക്ക് അല്പനേരം നോക്കിനിന്നു.  എന്‍റെ കണ്ണുകളില്‍ തീ പാറി.  കവിള്‍ത്തടം വിറക്കാന്‍ തുടങ്ങി.  പല്ലുകള്‍ ഞെരിച്ച്, വിറക്കാത്ത കൈകളോടെ വാള്‍ മുകളിലേക്കുയര്‍ത്തി കുത്തനെ പിടിച്ചു.  പൊടുന്നനെ അത് താഴേക്ക്‌ പതിച്ചു.  അവന്‍റെ കഴുത്തു തുളച്ച് അതിന്‍റെ മുന മെത്തയിലേയ്ക്കാഴ്ന്നിറങ്ങി  .അവന്‍റെ നാഭിയില്‍നിന്നും പുറത്തുവന്ന ശബ്ദം കണ്‍ഠത്തിലെത്തും മുന്‍പ് രക്തത്തില്‍ ലയിച്ച് ഇല്ലാതെയായി.  ഒന്ന് ഞെരങ്ങി അവന്‍ നിശ്ചലനായി.  നിഗൂഢമായ ആനന്ദത്തോടെ ആ കാഴ്ച ഞാന്‍ കണ്ടു നിന്നു.  അവന്‍ മരിച്ചു എന്നുറപ്പായപ്പോള്‍ കാവിലേക്കു മടങ്ങി.  ദൈവത്തിന്‍റെ കയ്യൊപ്പുകള്‍ ഒന്നും തന്നെ അവശേഷിപ്പിക്കാതെ.

   തെള്ളിപ്പൊടിയെറിഞ്ഞു തീ പാറിയപ്പോള്‍ പെരുവണ്ണാനിലെ ഭദ്രകാളിയുണര്‍ന്നു.  ദാരികാസുരനെ വധിച്ച്‌ അവന്‍റെ രക്തം പാനം ചെയ്ത് കുടല്‍മാല ആഭരണമാക്കിയ ആനന്ദത്തോടെ ഭഗവതി നൃത്തം ചെയ്തു.

   പെരുവണ്ണാന്‍ ഉണര്‍ന്നു.  തന്നില്‍നിന്നും ഒരായിരം കേളുപ്പെരുവണ്ണാന്മാര്‍ ജനിച്ചിരുന്നെങ്കില്‍ എന്നാശിച്ചു.  ആള്‍ക്കൂട്ടത്തിനിടയില്‍ അവശേഷിക്കുന്ന അവന്‍റെ കൂട്ടാളികളെ തന്‍റെ അവതാരങ്ങള്‍ കൊന്നോടുക്കട്ടെ എന്നാഗ്രഹിച്ചു.

    പെരുവണ്ണാനിലെ ഭദ്രകാളി സടകുടഞ്ഞെഴുന്നേറ്റു.  ഇനിയും ഭൂമിയില്‍ അവശേഷിക്കുന്ന ദാനവദാരികന്മാരെപ്പറ്റിയോര്‍ത്ത് കലിതുള്ളി വിറച്ചു.  അവരുടെ രക്തത്തിനായി ദാഹിച്ചു.  ഭഗവതിയുടെ താണ്ഡവം

 അതിന്‍റെ പരകൊടിയിലെത്തിയിരിക്കുന്നു.

       പെരുവണ്ണാന്‍റെ നെഞ്ചിലൂടെ ഒരു മിന്നല്‍പ്പിണര്‍ പാഞ്ഞു.  ചുവന്ന മുഖത്തെഴുത്തിന് താഴെ വിയര്‍പ്പുഗ്രന്ധികള്‍ അണപോട്ടിയോഴുകി.  ആവലാതി പറയാന്‍ വന്ന ഭക്തരെ കണ്ടില്ല.  അരുളപ്പാടുകള്‍ ഒന്നും തന്നെയുണ്ടായില്ല.  ചുവന്ന കണ്ണുകള്‍ പുറത്തേക്ക് തള്ളിവന്നു.  വെളുത്ത ദംഷ്ട്രയിലൂടെ രക്തം ഒഴുകിയിറങ്ങി.  അതിഭയങ്കരമായി അലറിവിളിച്ചുകൊണ്ട് പെരുവണ്ണാന്‍ നിലത്തുവീണ് നിശ്ചലനായി. മുടിയഴിക്കും മുന്‍പേ.

         മൈലുകള്‍ക്കപ്പുരമുള്ള ഭഗവതിക്ഷേത്രത്തിലെ ശ്രീകോവില്‍ നട വലിയ ശബ്ദത്തോടെ മലര്‍ക്കെത്തുറന്നു.  രുഷ്ടഭാവം വെടിഞ്ഞ ഭഗവതി പുത്രവിയോഗത്താല്‍ തേങ്ങിക്കരഞ്ഞു.  ആ കണ്ണുനീരിനു രക്തവര്‍ണമായിരുന്നു.  കേളുപ്പെരുവണ്ണാന്‍റെ ഹൃദയം പിളര്‍ന്ന് പുറത്തെക്കൊഴുകിയ ചുടുചോര തന്നെയായിരുന്നു അത്.

 

******************************************************

Theyyattam

എനിക്ക് വളരെ പ്രിയപ്പെട്ട കഥയാണ്‌ തെയ്യാട്ടം. 3 മാസത്തെ പരിശ്രമത്തിന്‍റെ ഫലമാണ് തെയ്യാട്ടം. എനിക്ക് കോളെജില്‍ യുവകഥാകാരി പുരസ്കാരം നേടിത്തന്ന കഥയാണിത്. വടക്കന്‍ കേരളത്തില്‍ പ്രചാരത്തിലുള്ള തെയ്യം എന്നാ അനുഷ്ഠാന കലാരൂപം ഞാന്‍ നേരില്‍ കണ്ടിട്ടു പോലുമില്ല. എനിക്കിതെഴുതാന്‍ സഹായകമായത് കേരള ഫോക്ക്ലോര്‍ പുസ്തകങ്ങള്‍ ആണ്.  ഇത് ബ്ലോഗില്‍ ഇടണമോ എന്ന് ഞാന്‍ ആശയക്കുഴപ്പത്തില്‍ ആയിരുന്നു. കാരണം ഈ കഥയെ ഇഷ്ട്ടപ്പെടുന്നിടത്തോളം തന്നെ ഞാന്‍ ഇതിനെ ഭയക്കുന്നു. ഇതെഴുതുന്ന സമയങ്ങളില്‍ അസാധാരണമായ ഊര്‍ജം ഇതില്‍ നിന്നും പുറപ്പെട്ടിരുന്നു. എന്റെ ആരോഗ്യത്തെ പോലും അത് ബാധിച്ചിരുന്നു. നിങ്ങള്‍ ഇത് വിശ്വസിക്കുമോ എന്നെനിക്കറിയില്ല. വിശ്വസിച്ചാലും ഇല്ലെങ്കിലും അത് സത്യമാണ്. ഈ അടുത്ത കാലം വരെ തെയാട്ടത്തില്‍ തൊടാന്‍ പോലും ഞാന്‍ ഭയപ്പെട്ടിരുന്നു.  സൃഷ്ടാവ് സൃഷ്ടിയെ ഭയക്കുന്ന അസാധാരണമായ അനുഭവം. എന്തായാലും നിങ്ങള്ക്ക് ഇത് ഇഷ്ടമാകുമെന്ന് ഞാന്‍ വിശ്വസിക്കുന്നു.

എന്ന്

സ്നേഹത്തോടെ 

സഹ്യപുത്രി

Tinku Maria 2

Advertisements

2 Responses to “തെയ്യാട്ടം”

  1. Shijo.T.P said

    Last second line, it’s too good.

    Like

  2. Grace Samuel said

    I don’t like to read this type of stories. I like only biblical stories

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

 
Tuesday Conference

Blogging Theology, Philosophy and Religious Ethics.

SABS St Thomas Province, Changanassery

Rita Bhavan, Koothrappally

കടലാസ്

ഒളിച്ചുവയ്ക്കനുള്ളതല്ല, വിളിച്ചുപറയനുള്ളതാണ് കല. www.facebook.com/kadalaass

NOYEL SEBASTIAN ANIYARA

"IF YOU TREMBLE INDIGNATION AT EVERY INJUSTICE THEN YOU ARE A COMRADE OF MINE".

Georgejoy's Blog

This WordPress.com site is the cat’s pajamas

varkeyvithayathilmcbs

YOUR LOVING ചങ്ങാതി

AURVEDAM

GREAT AURVEDA REMEDIES

MCBS African Mission

Missionary Congregation of the Blessed Sacrament

VatiKos Theologie

Bible Theology Spirituality

Emmaus Retreat Centre, Mallappally

Divyakarunya Mariyabhavan: MCBS Retreat & Counselling Centre at its Birthplace

Mullamuttukal......

Beauty of Childhood

Benno John Manjappallikkunnel

Life is to Love; Live to Love God

MCBS Ndono Parish, Africa

MCBS Parish in Tabora Diocese

Divyakarunya Mariyabhavan, Mallappally

Emmaus: MCBS Counselling & Retreat Centre at its Birth Place

Bro.Jobin karipacheril MCBS

LORD MAKE ME AN INSTRUMENT OF YOUR LOVE

Anto Kottadikunnel MCBS

To Become the Bread for the Lord

Jyothi Public School, Nalamile

A School for Excellence

josephmcbs

THE ONE IS TO SERVE

കണ്ണാടിപൊട്ടുകള്‍

നിനക്കായി ജാലകം തുറക്കുന്നു ...

SANJOE SEMINARY, SOLAPUR

MCBS Mission Minor Seminary

ebiangelfriend4u

Friend is heart and friendship is heartbeats...

geopaulose

Just another WordPress.com site

bibinmcbs

Just another WordPress.com site

ajeeshkashamkulam

Its all about me and my sharing of views

Marian Family for Christ

Just another WordPress.com site

വചനം തിരുവചനം

ദൈവത്തിന്റെ വചനം സജീവവും ഊര്ജസ്വലവും ആണ് ;ഇരുതലവാളിനെക്കാള്‍ മൂര്‍ച്ച ഏറിയതും ,ചേതനയിലും ആത്മാവിലും സന്ധിബന്ധങ്ങളിലും മജ്ജയിലും തുളച്ചു കയറി ഹൃദയത്തിന്റെ വിചാരങ്ങളെയും നിയോഗങ്ങള്‍ വിവേചിക്കുന്നതുമാണ്

Vipin Cheradil MCBS

Missionary Congregation of the Blessed Sacrament

Lisieux Minor Seminary, Athirampuzha

Formation House of MCBS Emmaus Province

Karunikan Group of Publications, India

Karuniknan, Smart Companion, Smart Family

MCBS EMMAUS PROVINCE

Missionary Congregation of the Blessed Sacrament

MCBS AFRICAN MISSION

Missionary Congregation of the Blessed Sacrament

MCBS EMMAUS SAMPREETHY

Charitable Institute for the Differently Abled

Fr Antony Madathikandam MCBS

Live to Love Him to the Eternity

Mangalapuzha Seminary / മംഗലപ്പുഴ സെമിനാരി

St Joseph Pontifical Seminary, Alwaye, India / സെന്റ്‌ ജോസഫ് പൊന്റിഫിക്കല്‍ സെമിനാരി, ആലുവ

%d bloggers like this: